პირველად საქართველოში ვირტუალური ზონის კომპანიას ჯარიმა სრულად მოეხსნა

თბილისის საქალაქო სასამართლომ პრეცედენტული გადაწყვეტილება მიიღო — სრულად დააკმაყოფილა ვირტუალური ზონის კომპანიის (რომელიც ასოციაციის წევრია) სარჩელი, რომელიც 34,709 ლარის ოდენობის საგადასახადო ჯარიმების გაბათილებას ითხოვდა.

ეს საქმე მნიშვნელოვან ნიშნულს წარმოადგენს საქართველოს IT ინდუსტრიისთვის, რადგან კიდევ ერთხელ ადასტურებს, რომ ვირტუალური ზონის სტატუსის მქონე კომპანიებს საგადასახადო შეღავათების მიღება შეუზღუდავად და კანონის სრული დაცვით ეკუთვნით.

საქმის მიმოხილვა

კომპანია, რომელიც საერთაშორისო კლიენტებისთვის პროგრამულ უზრუნველყოფას ქმნის, შემოსავლების სამსახურის ყურადღების ცენტრში მოექცა 2018 წლის 26 სექტემბრიდან 2021 წლის 1 მაისის პერიოდში. საგადასახადო ორგანოს გადაწყვეტილებით, კომპანიას საერთო ჯამში 34,709 ლარის ოდენობის სანქცია დაეკისრა, რაც მოიცავდა 19,432 ლარის ძირითად გადასახადს, 9,737 ლარის ჯარიმას და 5,540 ლარის ვადაგადაცილებისთვის დარიცხულ პირგასამტეხლოს. მათი არგუმენტი იყო, რომ დირექტორის გარდა სხვა თანამშრომლის არარსებობა ეწინააღმდეგებოდა იმ პირობებს, რომლებიც საგადასახადო შეღავათების მიღების წინაპირობას წარმოადგენს.

თუმცა, სასამართლომ დაადგინა, რომ კომპანიის საქმიანობა სრულად შეესაბამებოდა საქართველოს კანონმდებლობას — მათ შორის, ინფორმაციული ტექნოლოგიების შესახებ  კანონსაც და საგადასახადო კოდექსსაც. ამასთან, სასამართლოს გადაწყვეტილებით, შემოსავლების სამსახურის მოთხოვნები, რომლებიც ე.წ. მეთოდურ მითითებებზე იყო დაფუძნებული, არაკონსტიტუციური აღმოჩნდა.

ასოციაციისა და Just Advisors-ის როლი

ვირტუალური ზონის პირთა ასოციაციამ მნიშვნელოვანი როლი შეასრულა ამ გამარჯვებაში — იგი აქტიურად იცავდა IT კომპანიების ინტერესებს და მტკიცედ იდგა თავისი წევრის გვერდით. ასოციაციამ სასამართლოს წარუდგინა ექსპერტის მოსაზრება, რითაც კიდევ უფრო გააძლიერა სარჩელის სამართლებრივი პოზიცია.

ასოციაციამ დიდი ძალისხმევა მიმართა იმისკენ, რომ  საგადასახადო ორგანოს მიერ გამოყენებული მეთოდური მითითებები გადაეხედათ და შეემსუბუქებინათ. მისი აქტიური ჩართულობით რეკომენდაციების ახალ ვერსიაში ასახული იქნა ბიზნესზე ორიენტირებული მიდგომები. ეს ცვლილება გარდამტეხი აღმოჩნდა საქმის მსვლელობისთვის და მნიშვნელოვანწილად განაპირობა სასამართლოს საბოლოო, დადებითი გადაწყვეტილება.

სამართლებრივი მხარდაჭერა

სამართლებრივი მხარდაჭერა უზრუნველყოფილი იყო Just Advisors-ის გუნდის მიერ, რომელსაც ადვოკატი გიორგი ჟუჟუნაშვილი ხელმძღვანელობდა. მისი არგუმენტები გადამწყვეტი აღმოჩნდა — გუნდმა წარმოადგინა, რომ შემოსავლების სამსახურის მეთოდურ მითითებებს არ გააჩნია იურიდიული ძალა და ვერ აღემატება საგადასახადო კოდექსით გარანტირებულ უფლებებს. გიორგი ხაზგასმით აღნიშნავდა, რომ სასამართლოს დასაბუთება მნიშვნელოვანი წილად ეფუძნება საქართველოს კონსტიტუციას, რომელიც იცავს საწარმოთა თავისუფლებას.

სასამართლო გადაწყვეტილებით გაირკვა, რომ ვირტუალური ზონის კომპანიებისთვის დაწესებული საგადასახადო შეღავათები არ შეიძლება შეზღუდულ იქნეს მეთოდური მითითებებით. გარდა ამისა, სასამართლომ დაადასტურა, რომ საქართველოში IT პროდუქტის განვითარება, თუნდაც დამატებითი თანამშრომლების გარეშე, სრულად შეესაბამება სამართლებრივ მოთხოვნებს. ასევე, გადაწყვეტილებაში მითითებულია ადმინისტრაციულ სამართალწარმოების პრინციპები, რომელთა მიხედვითაც საგადასახადო ორგანოს არ შეუძლია მიიღოს გადაწყვეტილებები არასრულყოფილად შესწავლილი ფაქტების საფუძველზე, რაც დამატებით საფუძველს იძლევა სადავო ქმედებების გაუქმებისთვის.

სასამართლო გადაწყვეტილების შედეგი

სასამართლომ გააუქმა საგადასახადო ორგანოს ყველა სადავო გადაწყვეტილება და შემოსავლების სამსახურსა და ფინანსთა სამინისტროს დაავალა მოსარჩელისთვის გადახდილი სასამართლო ხარჯების ანაზღაურება.

ეს საქმე საქართველოს სასამართლო პრაქტიკაში პირველი პრეცედენტია, სადაც ვირტუალური ზონის პირს სრულად მოუხსნეს ყველა საგადასახადო ჯარიმა. ეს წარმატება აძლიერებს ნდობას სასამართლოს მიმართ და ხელს უწყობს IT სექტორის განვითარებას ქვეყანაში.

შეჯამება

სასამართლომ ბათილად ცნო საგადასახადო ორგანოს ყველა სადავო აქტი და შემოსავლების სამსახურსა და ფინანსთა სამინისტროს მოსარჩელის მიერ გადახდილი სასამართლო ხარჯების ანაზღაურება დააკისრა.

ეს სასამართლო გადაწყვეტილება მნიშვნელოვანი პრეცედენტია საქართველოს IT სექტორისთვის და ადასტურებს, რომ ვირტუალური ზონის კომპანიების უფლებები მტკიცედ არის დაცული. წარმატების დიდი წვლილი ეკუთვნის ასოციაციის მხრიდან წევრი კომპანიის აქტიურ ადვიკატირებას და Just Advisors-ის, განსაკუთრებით გიორგი ჟუჟუნაშვილის, პროფესიულ სამართლებრივ მხარდაჭერას. სასამართლოს ეს გადაწყვეტილება ხელს უწყობს საქართველოში ინოვაციური ბიზნესისთვის უფრო ღია და სამართლიანი გარემოს შექმნას.

უახლოეს დღეებში, ჩვენ შემოგთავაზებთ ექსკლუზიურ ინტერვიუს საქმის ადვიკატთან გიორგი ჟუჟუნაშვილთან, რომელიც უფრო ვრცლად გაშლის სამართლებრივ და საგადასახადო თემებს.