ასოციაციის თავმჯდომარემ შორენა კოპალეიშვილმა შემოსავლების სამსახურის უფროსს ლევან კაკავას განმარტებისთვის რამოდენიმე შეკითხვით მიმართა

როგორც უკვე ცნობილია, შემოსავლების სამსახურმა ვირტუალური ზონის პირის მოგების გადასახადით დაბეგვრის თაობაზე მეთოდური მითითება გამოსცა, რომელიც გარკვეულწილად ბუნდოვანია.

შესაბამისად,  ასოციაციის თავმჯდომარემ შორენა კოპალეიშვილმა შემოსავლების სამსახურის უფროსს ლევან კაკავას განმარტებისთვის რამოდენიმე შეკითხვით მიმართა.

გთავაზობთ კითხვების მოკლე მიმოხილვას: 

• გააჩნია თუ არა უკუძალა აღნიშნულ მეთოდურ მითითებას?
• აუცილებელია თუ არა დამფუძნებლის (დამფუძნებლების) მუდმივად ან/და დროებით ყოფნა საქართველოში?
• საგადასახადო შეღავათებით სარგებლობისთვის რა იგულისხმება სხვა ფაქტობრივ გარემოებებში, გარდა ადგილობრივი პერსონალის დასაქმებისა?
• გთხოვთ მიუთითოთ წყარო, რომლითაც უნდა იხელმძღვანელოს ბიზნესმა შესაბამისი პროფესიების მიხედვით საქართველოს შრომით ბაზარზე არსებული გასამრჯელოს განსაზღვრისას.
• სავალდებულოა თუ არა საქართველოში სხვა და სხვა პროფილის თანამშრომლების დაქირავება ან/და მუდმივი სამუშაო ფართის ქირავნობა/იჯარა გარდა შესაბამისი პროფილური განხრით დაქირავებული თანამშრომლებისა?
• შეიძლება თუ არა საზღვარგარეთ მომსახურების მიღება გახდეს საგადასახადო შეღავათისაგან განთავისუფლების საფუძველი?
• როგორ განვსაზღვროთ არარეზიდენტებისგან მიღებული სამუშაოს წილი და ამავდროულად შევინარჩუნოთ საგადასახადო შეღავათი?
• თუ ვირტუალური ზონის პირი იღებს საინფორმაციო ტექნოლოგიების შექმნის მომსახურებას საქართველოში, ითვლება თუ არა, რომ საინფორმაციო ტექნოლოგიების პროდუქტი საქართველოს ტერიტორიაზეა შექმნილი?
• თუ კომპანიას აღარ დასჭირდება პროფილული განხრით მომუშავე ადამიანების დაქირავება საინფორმაციო პროდუქტის შესაქმენლად და ის იყენებს პროდუქტის მხარდაჭერისთვის საჭირო ადმიანურ რესურს, ასეთ შემთხვევაში მხოლოდ საინფორმაციო პროდუქტის მხარდაჭერისთვის დაქირავებული პერსონალის გასამრჯელოზე გავრცელდება თუ არა საგადასახადო შეღავათი?
• არის თუ არა სამართლიანი, რომ კომპანიებმა, რომლებმაც შექმნეს პროდუქტი სტატუსის მინიჭებამდე, თუმცა აგრძელებენ მის მხარდაჭერას,  ვერ სარგებლობენ შეღავათით მოგების გადასახადში?
• ზოგიერთი ტექნოლოგიური სერვისის მიმწოდებელი საქართველოში ჯერ არ არსებობს. როგორ განსაზღვრავს საგადასახადო მეთოდოლოგია ამ შემთხვევაში IT პროდუქტის შექმნის ადგილს?
• შეუძლია თუ არა კომპანიას მიიღოს ჰონორარი მისი მოგების წილზე მომდევნო რამდენიმე წლის განმავლობაში განვითარების ხარჯების გარეშე?
• როგორ უნდა მოიქცეს ვირტუალური ზონის პირის სტატუსის მქონე დაჯარიმებული კომპანია, თუ მეთოდური მითითების მიხედვით მასზე ვრცელდება საგადასახადო  შეღავათი ჯარიმის ნაწილში?
• თუ ვირტუალური ზონის სტატუსის მქონე კომპანია მიიღებს IT სერვისს ადგილობრივი იურიდიული პირებისგან ან/და ინდივიდუალური მეწარმისგან, ჩაითვლება თუ არა, რომ საწარმო იყენებს შესაბამისი პროფილური განხრით საქართველოში დაქირავებული პირ(ებ)ის შრომას შესაბამისი პროფილით?

გთხოვთ შეგვატყობინოთ, დამატებით რა  კითხვებს დასვამდით  შემოსავლების სამსახურის უფროსთან ამ თემასთან  დაკავშირებით? ჩვენთვის მნიშვნელოვანია თქვენი მოსაზრება.