საქართველოს IT სექტორი 2025 წლის პირველ ნახევარში ინარჩუნებს მზარდ დინამიკას
ასოციაცია ევროპული ბიზნეს ასოციაციის იურიდიული კომიტეტის სხდომაზე
სექტემბერი 29, 2025
ეროვნული ბანკის სტატისტიკის მიხედვით, საქართველოს IT სექტორის საგარეო შემოსავლები ბოლო წლების განმავლობაში საგრძნობლად გაიზარდა.
თუ 2013 წელს ეს მაჩვენებელი მხოლოდ 3 მილიონ დოლარს შეადგენდა, 2025 წლის პირველ ნახევარში უკვე 489 მილიონ დოლარს აღწევს — რაც დაახლოებით 160-ჯერ მეტი ზრდაა წინა წლებთან შედარებით, ასევე 2024 წლის იმავე პერიოდთან შედარებით 55%-ით, ანუ 174 მილიონი დოლარით მეტია.
აღნიშნული ზრდა აისახა ინფორმაციისა და კომუნიკაციის სექტორის მაჩვენებლებზე მთლიანად — 2025 წლის პირველ კვარტალში ზრდამ 28.6%, ხოლო მეორე კვარტალში 37.1% შეადგინა.
მიუხედავად იმისა, რომ 2024 წელს IT სექტორის მიერ მომსახურების ექსპორტიდან მიღებული შემოსავალი 688 მილიონ დოლარს შეადგენდა და 2023 წლის რეკორდულ მაჩვენებელს — 784 მილიონ დოლარს ჩამოუვარდებოდა, 2025 წლის პირველ ნახევარში დაფიქსირებული მონაცემები სექტორის სწრაფი აღდგენისა და სტაბილური ზრდის ტენდენციას ადასტურებს.
საქსტატის მონაცემებით, ინფორმაციისა და კომუნიკაციების სფეროში დასაქმებულთა რაოდენობა ბოლო წლების განმავლობაში თანმიმდევრულად იზრდება. თუ 2012 წელს ამ სექტორში მხოლოდ 20,446 ადამიანი მუშაობდა, 2024 წელს — 48,158 ადამიანი, ხოლო 2025 წლის პირველ ნახევარში ეს რიცხვი უკვე 49,792 ადამიანს აღწევს — რაც ორჯერ მეტია.
ხელფასების ზრდა მკაფიოდ ასახავს IT სექტორის განვითარების დინამიკას და კვალიფიციური კადრების მაღალ მოთხოვნას. ბოლო წლების განმავლობაში საშუალო ხელფასი მნიშვნელოვნად გაიზარდა, რაც 2025 წლისთვის 4,243 ლარს შეადგენს. არსებული ტენდენციები მიუთითებს, რომ სექტორი განაგრძობს განვითარებას როგორც შემოსავლების, ისე სამუშაო შესაძლებლობების თვალსაზრისით.
საქართველოს IT სექტორის ზრდა მნიშვნელოვნად უწყობს ხელს ეკონომიკის განვითარებას და ქვეყნის პოზიციონირებას გლობალურ ტექნოლოგიურ ბაზარზე, რაც კიდევ ერთხელ ადასტურებს ამ მიმართულების სტრატეგიულ მნიშვნელობას ქვეყნის ეკონომიკური განვითარებისათვის.
წყარო