ასოციაციის საკანონმდებლო წინადადების დეტალები „ბიზნეს ფორმულაში“

საქართველოს ვირტუალური ზონის პირთა ასოციაციამ, იურისტებთან და ექსპერტებთან ერთად პარლამენტში საკანონმდებლო წინადადება წარადგინა. შეხვედრის და ბიზნესის ინიციატივის დეტალები გაშუქდა „ბიზნეს ფორმულაში”. საკანონმდებლო ინიციატივა ვირტუალური ზონის სტატუსის მქონე კომპანიებთან დაკავშირებული დაბეგვრის წესებს და საკითხებს უკვე საკანონმდებლო დონეზე დაარეგულირებს და ეს წესები მხოლოდ შემოსავლების სამსახურის მეთოდურ მითითებაში აღარ იქნება მითითებული. ასოციაცის წარმომადგენლებმა პარლამენტში უკვე გამართეს შეხვედრები, ახალა კი ფინანსთა სამინისტროს პოზიციის მოლოდინში არიან. 

ასოციაცია ექსპერტებთან ერთად კვლავ რჩება იმ პოზიციაზე რომ აუცილებელი და მნიშვნელოვანი არის საკანონმდებლო ცვლილებების განხორციელება. ამ საკითხის დარეგულირებით კიდევ ერთხელ შეიქმნება სტაბილური გარემო ბიზნესისთვის და ქვეყანაში დამატებითი ინვესტიციები შემოვა. ზოგიერთი კომპანია, რომლებსაც ჯარიმები სრულად მოეხსნა, ფიქრობენ, რომ საკუთარი ინიციატივით ისევ შევიდნენ სახელმწიფოსთან დავაში იმ მორალური და ფინანსური ზიანისთვის, რომელიც ამ კომპანიებს მიადგა ორ წლიანი აუდიტის და მიღებული გადაწყვეტილებების შედეგად. ასოციაცია კი მთელ ამ პროცესებში ცდილობს, რომ ამ საკანონმდებლო ინიციატივით და ცვლილებებით ეს დავის პროცესი საბოლოოდ დახუროს.

“პრობლემად რჩება ბუნდოვანი და დაუზუსტებელი კანონმდებლობა, რაც ქმნის იმის რისკს, რომ კომპანიები მომავალშიც აღმოჩნდებიან საგადასახადო წნეხის ქვეშ. ეს ვითარება კი ინვესტორებს სტაბილურობის განცდას არ უტოვებს. ამიტომ ასოციაციაში ისევ იმ აზრზე ვართ, რომ აუცილებელია საკანონმდებლო ცვლილებებით დეტალურად გაიწეროს, თუ როგორ რეგულირდებიან და იბეგრებიან ამ სტატუსის მქონე კომპანიები. ამ საკითხის საკანონმდებლო დონეზე გადაწყვეტით შევქმნით სტაბილურ გარემოს ბიზნესისთვის და ხელს შევუწყობთ ქვეყანაში IT დარგში დამატებითი ინვესტიციების შემოსვლას და არსებულის შენარჩუნებას, რაც ამ ორწლიანი პერიოდის განმავლობაში საკმაოდ პრობლემური იყო“, – განაცხადა შორენა კოპალეიშვილმა.