შეხვედრა საქართველოს ფინანსთა მინისტრის მოადგილესთან

25 ივლისს საქართველოს ვირტუალური ზონის პირთა ასოციაციამ, მისი თავმჯდომარის შორენა კოპალეიშვილის ხელმძღვანელობით ონლაინ ფორმატში მორიგი მნიშვნელოვანი შეხვედრა გამართა. მასში მონაწილეობა მიიღო საქართველოს ფინანსთა მინისტრის მოადგილე მამუკა ბარათაშვილმა, საგადასახადო და საბაჟო პოლიტიკის დეპარტამენტის ხელმძღვანელმა მარინე ხურციძემ და Kreston Georgia-ს მმართველმა პარტნიორმა დავით პაპიაშვილმა, რომლის ავტორობითაც მომზადებული საკანონმდებლო წინადადების დეტალები იყო შეხვედრის განხილვის მთავარი თემა. 

მხარეებმა მიმოიხილეს ინიციატივის ისეთი სამართლებრივი დეტალები, როგორიცაა საინფორმაციო ტექნოლოგიური პროდუქტის საქართველოში შექმნილად მიკუთვნების საკითხი, საქართველოს საგადასახადო კოდექსით ვირტუალური ზონის პირების საშეღავათო რეჟიმის დაბეგვრის მკაფიოდ განსაზღვრული პირობები, ორმაგი დაბეგვრის თავიდან აცილების შეთანხმებების სპეციფიკა ვზპ კომპანიებთან მიმართებაში, საინფორმაციო ტექნოლოგიური პროდუქტის ცნება და სხვა. ასევე მოხდა სხვა მნიშვნელოვან საკითხებზე აზრთა და ინფორმაციის ურთიერთგაცვლა. შეხვედრის მონაწილეებმა ისაუბრეს კონსესუსის აუცილებლობაზე და მისი მიღწევის გზებზე. 

ხაზგასასმელია, რომ ფინანსთა სამინისტორს მხრიდან ასოციაციის მიერ წარდგენილი საკანონმდებლო დაზუსტებების და ცვლილებების პაკეტი შეფასდა დადებითად. ასევე აღინიშნა, რომ არსებული რედაქციით მოქმედი კანონმდებლობა უდაოდ საჭიროებს დაზუსტებას. უფრო მეტიც, უწყება იზიარებს ინიციატივის ძირითად პრინციპებს, თუმცა საბოლოო გადაწყვეტილება ინიციატივის განხილვის დაწყების შესახებ ამ მომენტისთვის მიღებული არ არის. 

ასოციაციისთვის ცნობილი გახდა, რომ საქართველოს ფინანსთა სამინისტრო განიხილავს გარკვეული რეფორმების/ცვლილებების განხორცილებას სხვა და სხვა სპეც რეჟიმებთან მიმართებაში. ჩვენ იმედს ვიტოვებთ, წარსული გამოცდილების გათვალისწინებით, მოხდება ბიზნესთან დროული კომუნიკაცია და კომპანიები არ აღმოჩნდებიან იმდაგვარი მოულოდნელი გადაწყვეტილებების პირისპის, რაც საბოლოოდ დაუკარგავს ამ დარგს საქართველოში განვითარების პერსპექტივას. 

თავის მხრივ, არსებული გამოწვევების გათვალისწინებით ასოციაცია მის პარტნიორებთან ერთად კვლავ აგრძელებს აქტიურ მუშაობს საკანონმდებლო ცვლილებების მისაღწევად.