ასოციაცია აგრძელებს სახელმწიფო სტრუქტურებთან შეხვედრებს

მიმდინარე წლის 26 ივლისს შედგა საქართველოს ვირტუალური ზონის პირთა ასოციაციის თავმჯდომარის შორენა კოპალეიშვილის შეხვედრა საქართველოს ფინანსთა სამინისტროსა და შემოსავლების სამსახურის წარმომადგენლებთან.

შეხვედრას ესწრებოდნენ საგადასახადო და საბაჟო პოლიტიკის დეპარტამენტის წარმომადგენლები და ასევე საგადასახადო და საბაჟო მეთოდოლოგიის დეპარტამენტის ხელმძღვანელი პირები.

ასოციაციის მხრიდან შეხვედრაში აგრეთვე იღებდა მონაწილეობას ბ-ნი დავით პაპიაშვილი (საერთაშორისო ქსელური აუდიტორული კომპანია Kreston Georgia -ს მმართველი პარტნიორი – საქართველოს საგადასახადო კანონმდებლობის ერთ-ერთი ყველაზე კვალიფიცირებული ექსპერტი).

შორენა კოპალეიშვილმა კიდევ ერთხელ გაახმოვანა ის ვითარება, რომელშიც აღმოჩნდნენ ვირტუალური ზონის პირის სტატუსის მქონე კომპანიები. ბიზნესის ლეგიტიმური ინტერესებიდან გამომდინარე, წარმოდგენილ იქნა კონკრეტული არგუმენტები და დასაბუთება, რომლებიც ადასტურებენ კანონის ბუნდოვანებას, კონკრეტული მკაფიო კრიტერიუმების არარსებობას, წინააღმდეგობრივ გადაწყვეტილებებს, საგადასახადო ორგანოების ქმედებებს, ბიზნესის პრინციპულ პოზიციასა და სხვ.

პროფილური უწყების წარმომადგენლებმა თავის მხრივ, ისაუბრეს კანონის მიღების ძირითად მიზნებსა და შექმნილ ვითარებაში საკუთარ პოზიციაზე. როგორც აღმოჩნდა არაერთი კითხვა, რომლებზეც ბიზნესმა უკვე რამდენიმე თვეა ვერ მიიღო კონკრეტული პასუხები ჯერ კიდევ დამუშავების პროცესშია (მაგალითად, მეთოდური მითითების საფუძველზე გადაწყვეტილებების მიღება და მისი უკუძალით გამოყენების კანონიერება, ხელფასის განსაზღვრა საბაზრო ღირებულებით, არ არის განმარტებული რამდენი პროცენტით უნდა იქნას შექმნილი პროდუქტი საქათველოში ან საერთო ხარჯის რა ნაწილი (20%, 40%, 60%, 80% თუ რამდენი) უნდა იქნეს გაწეული საქართველოში რომ იგი ჩაითვალოს საქართველოში წარმოებულად). უწყების მხრიდან გამოითქვა საქართველოს ვირტუალური ზონის პირთა ასოციაციასთან თანამშრომლობის სურვილი, რათა მივაწოდოთ დასკვნები იმ საკითხებთან დაკავშირებით, რაზეც ამ ეტაპზე მკაფიო პოზოცია არ არის ჩამოყალიბებული. ასოციაციის მხრიდან გამოიხატა პროცესებში ჩართვის მზაობა. 

ასოციაციის თავმჯდომარე დაინტერესდა თუ რამდენად მართებულია კომპანიების მასობრივი დაჯარიმება იმის ფონზე, როცა რიგ საკითხზე არ არსებობს მკაფიო და ერთგვაროვანი მიდგომა, ხედვა, პოზიცია. 

ასოციაცია პრინციპულად იცავს თავის პოზიციას კომპანიების დარიცხული გადასახადებისა და სანქციებისაგან განთავისუფლების საკითხთან დაკავშირებით და აგრეთვე მიაჩნია მნიშვნელოვნად, რომ დაზუსტდეს კანონმდებლობა, რაც კიდევ ერთხელ აღინიშნა შეხვედრაზე.

მიუხედავ სახელმწიფო სტუქტურების განსხვავებული პოზიციისა, განსაკუთრებით გასული პერიდით დარიცხული ჯარიმების ნაწილში, საქართველოს ვირტუალური ზონის პირთა ასოციაცია მზადაა კვლავ გააგრძელოს მოლაპარაკებები და შეხვედრები სხვა სახელმწიფო უწყებებთან, რადგან სიმართლე დაზარალებული კომპანიების მხარესაა და მოქმედება უნდა გაგრძელდეს.