ასოციაციის ოფიციალური მიმართვა ხელისუფლების უმაღლეს წარმომადგენლებს

საქართველოს ვირტუალური ზონის პირთა ასოციაცია აგრძელებს აქტიურ და ეფექტურ საქმიანობას. შესაბამისად, სულ უფრო მეტი საერთაშორისო ორგანიზაცია ინტერესდება ვზპ-ის საკითხებით.

8 ივლისს, ასოციაციის თავმჯდომარემ, შორენა კოპალეიშვილმა გამართა შეხვედრა ევროპული ბიზნეს ასოციაციის , ევროპის რეკონსტრუქციისა და განვითარების ბანკის (EBRD) და ინვესტორთა საბჭოს წარმომადგენლებთან. ამ ორგანიზაციების ძირითადი საქმიანობაა დიალოგის ხელშეწყობა ბიზნეს საზოგადოებას, საერთაშორისო საფინანსო ინსტიტუტებსა და დონორებს შორის; ინოვაციების მეშვეობით კერძო სექტორის კონკურენტუნარიანობის მხარდაჭერა; ადგილობრივი ვალუტისა და კაპიტალის ბაზრების განვითარება; ბაზრების გაფართოება რეგიონთაშორისი კავშირის საშუალებით. შეხვედრაზე განიხილეს ვირტუალური ზონის პირის სტატუსის მქონე IT კომპანიების წინაშე არსებული სირთულეები, რაც გულისხმობს ბუნდოვან კანონს, რომელიც იძლევა ინტერპრეტაციის საშუალებას, მასიური აუდიტები და კომპანიების მილიონობით ლარით რეტროსპექტული დაჯარიმება, რაც უკვე გახდა ამ ბიზნესის პრობლემა და უამრავი კომონიის ქვეყნის ბაზრიდან გასვლის მიზეზი.

12 ივლისს, ასოციაციის თავმჯდომარემ, შორენა კოპალეიშვილმა ოფიციალურად მიმარა საქართველოს პრემიერ-მინისტრს, ირაკლი ღარიბაშვილს, სადაც მან ყურადღება გაამახვილა რიგ საკითხებზე, რომლებმაც შეიძლება მნიშვნელოვნად დააზარალოს უცხოური ინვესტიციები და ქვეყნის რეპუტაცია. მან აღნიშნა ის ფაქტი, რომ 2021 წლიდან “ვირტუალური ზონის პირებთან მიმართებაში” საგადასახადო მიდგომა მოულოდნელად შეიცვალა ბიზნესთან ყოველგვარი კომუნიკაციის გარეშე, რის შედეგადაც, დაიკარგა მნიშვნელოვანი შემოსავლები,ინვესტიციები და გართულდა ახალი ინვესტორების მოზიდვა არსებული სიტუაციის გამო. ასევე, ის უზიარებს ინფორმაციას ბიზნესის მიერ სახელმწიფო ბიუჯეტში გადახდილი გადასახადების შესახებ, რაც მათთვის კანონით მკაფიოდ და ზუსტად იყო განსაზღვრული. ამავდროულად, იგი მზადყოფნას აცხადებს თანამშომლობითვის.

ასევე, 12 ივლისს შორენა კოპალეიშვილმა წერილით მიმართა საქართველოს ფინანსთა მინისტრს ლ.ხუციშვილს. მან ხაზი გაუსვა ორ მთავარ კითხვას აქტუალურ საკითხებთან დაკავშირებით, რომლებზეც ბიზნესს დღემდე არ მიუღია მკაფიო პასუხი. 1. რატომ მოხდა მიდგომის ასეთი ხისტი ცვლილება ამდენი წლის შემდეგ ბიზნესთან ყოველგვარი კომუნიკაციის გარეშე, რამაც უარყოფითი გავლენა მოახდინა თითოეული მეწარმის ბიზნესზე და გარდა ამისა, ამ ფაქტმა გამოიწვია ასობით ინვესტორის ქვეყნიდან გასვლა და ზიანი მიაყენა ქვეყნის საერთაშორისო რეპუტაციას; 2. რატომ ჯარიმდება ბიზნესი კოლექტიურად მაშინ როდესაც იმ დროისთვის არ არსებობდა სიტუაციური მითითებები და იურიდიული ნორმები ჯერ კიდევ ბუნდოვანია.

ზემოაღნიშნული მიმართვები პასუხის მიღებამდე ვერ გახდება საჯარო.

გარდა ამისა, საქართველოს ვირტუალური ზონის პირთა ასოციაცია მიზანმიმართულად მიიწევს წინ. ასოციაცია პარტნიორებთან (იურიდიულ და აუდიტორულ კომპანიებთან) ერთად ახორციელებს საკანონმდებლო ინიციატივით პარლამენტში მიმართვის წინასწარ სამუშაოებს. 

ასოციაციის ძალისხმევით, საქმით ინტერესდებიან ზემდგომი ორგანოები. შესაბამისად, ჩნდება მეტი პოზიტიური მოლოდინი საკითხის სწორად და სამართლიანად გადაწყვეტასთან დაკავშირებით. 

ვიმედოვნებთ, რომ მხარეებს შორის მოხდება პოზიციების ისეთი დაახლოება, რომ ქვეყნის საგადასახადო ინტერესები დაცული იქნება ინვესტორების ლეგალური საქმიანობის დარღვევის გარეშე. ჩვენ გვჯერა, რომ ასეთი ძალისხმევით, საერთო მიზანი მიიღწევა და ყველა დაინტერესებული მხარე იქნება სამართლიანად მომგებიან პოზიციაში.