ინფორმაციული ტექნოლოგიების ინდუსტრია საქართველოში

ტექნოლოგიური აიტი ინდუსტრია შთამბეჭდავი და მრავალი მიმართულების მქონე სფეროა, თავისი უახლესი ტენდენციებით. საინფორმაციო და საკომუნიკაციო ინდუსტრია არა მხოლოდ ერთ-ერთი ყველაზე სწრაფად მზარდი ინდუსტრიაა, არამედ ის ასევე პირდაპირ ასაქმებს მილიონობით ადამიანს და გადამწყვეტია ინოვაციებისა და განვითარებისთვის.

მნიშვნელოვანია აღინიშნოს, რომ საქართველოს მთავრობაც იზიარებს შეხედულებას, რომ ქვეყანაში ინოვაციებისა და ტექნოლოგიური განვითარების დონე უნდა გაიზარდოს. ICT სექტორის განვითარება განიხილება, როგორც საქართველოს სოციალური და ეკონომიკური განვითარების ერთ-ერთი ქვაკუთხედი. დიდი მნიშვნელობა აქვს მის ეფექტურ ინტეგრაციას გლობალურ ეკონომიკაში.

განვითარებად ქვეყანაში ბიზნესის დაწყება არ არის მარტივი საქმე. Ჩვენი ქვეყნის გაცხადებული პოლიტიკა მიმართულია იმისკენ, რომ შეიქმნას ინფორმაციული და საკომუნიკაციო ტექნოლოგიების კერა. ბოლო წლებში საქართველო იკავებდა ლიდერის პოზიციებს ბიზნეს გარემოსთვის კრიტიკული ელემენტების ასპექტში. აღნიშნული ფაქტორები ხშირად გადამწყვეტ როლს თამაშობდა საქართველოს ბაზარზე ინვესტირების ან ბიზნესის წარმოებისთვის.

სახელმწიფო სტრუქტურების მიერ მოწოდებული ინფორმაციის საფუძველზე, ქვეყანაში პირდაპირი უცხოური ინვესტიციების ციფრები მაღალია. თუმცა, უნდა აღვნიშნოთ, რომ ეს ავტომატურად არ გულისხმობს სახელმწიფო უწყებებსა და ბიზნესს შორის კარგ და სწორ ურთიერთობას. ამ ციფრების ზრდა დაკავშირებულია პანდემიის დასრულებასთან. ეს ზრდა მხოლოდ დროებითია და ლოგიკურია, რომ ეს მაჩვენებელი წინა წლებთან შედარებით გაიზარდა.

2011 წელს საქართველოში IT ტექნოლოგიების განვითარებისა და ინვესტორების მოზიდვის მიზნით საგადასახადო კოდექსში ლიბერალური ცვლილებები შევიდა და ვირტუალური ზონის სტატუსის მქონე კომპანიებისთვის საგადასახადო შეღავათები დაწესდა, მაგრამ 2021 წლიდან შემოსავლების სამსახურის აუდიტის დეპარტამენტმა დააკისრა მოგების გადასახადი და ჯარიმები გადასახდელი თანხის 50%-ის ოდენობით მსგავსი სტატუსის მქონე კომპანიებისთვის, 2018 წლიდან რეტროსპექტულად. აღნიშნული გადაწყვეტილება მოტივირებული იყო იმით, რომ კომპანიებმა საქართველოში წარმოების ფაქტი ვერ დაადასტურეს. ბევრმა კომპანიამ საქართველოს ბაზარი დატოვა.

IT ინდუსტრიის პოპულარიზაციასთან ერთად, სახემწიფო პირველ რიგში უნდა გაუმკლავდეს არსებულ პრობლემას, რამაც გამოიწვია არსებული ინვესტორების გადინება და ახლის მოზიდვის შეუძლებლობა. საჭიროა კანონის სწორად შემუშავება, რომელიც ინტერპრეტაციის შესაძლებლობას გამორიცხავს, ვინაიდან ფართო საინტერპრეტაციო სივრცე, სამწუხაროდ, არაკეთილსინდისიერად გამოიყენება საგადასახადო სტრუქტურების მიერ.