ასოციაციამ შემოსავლების სამსახურისგან პასუხი მიიღო

როგორც ცნობილია, ვირტუალური ზონის სტატუსის მქონე კომპანიების რეტროსპექტულად დაჯარიმება ბუნდოვანი და ინტერპრეტირებული კანონით იყო გამოწვეული. კანონი ჯერ კიდევ იმდენად ბუნდოვანია, რომ უკმაყოფილო კომპანიების ზეწოლით სახელმწიფოს მოუხდა ეტაპობრივად ჯერ ერთი, შემდეგ კი მეორე მეთოდოლოგიის გამოქვეყნება, რამაც უამრავი კითხვა გააჩინა. 

საქართველოს ვირტუალური ზონის პირთა ასოციაციამ შეძლო შემოსავლების სამსახურთან კონტაქტის დამყარება და მის მიერ შემუშავებული კითხვების შესახებ დამატებითი განმარტებების მიღება. კითხვები ასოციაციის წევრების საქმიანობიდან გამომდინარე ჩამოყალიბდა.

შემოსავლების სამსახურმა წერილში გარკვეული განმარტებები გააკეთა ვირტუალური ზონის პირის სტატუსის მქონე კომპანიების საქმიანობასთან დაკავშირებულ საკითხებზე. სამსახურის უფროსის მოადგილემ ლევან წითელაშვილმა ასევე აღნიშნა, რომ მომზადებულია ვირტუალური ზონის პირთა მოგების გადასახადით დაბეგვრის თაობაზე მეთოდური მითითების შესწორებული პროექტი და გადის შემდგომ სამართლებრივ პროცედურებს.

 არათანმიმდევრულმა და არასამართლიანმა ნაბიჯებმა შემოსავლების სამსახური თავის მართლების რეჟიმში მოაქცია. მათი პასუხი ხელმისაწვდომია როგორც ქართულ, ასევე ინგლისურ ენებზე.

 მიუხედავად იმისა, რომ დამატებითი დაზუსტება და ბიზნესთან კომუნიკაცია მნიშვნელოვანია, მთავარი მიზანი და პრიორიტეტი კანონის დაზუსტებაა, ამიტომ ასოციაცია ამ მიმართულებით აქტიურად მუშაობს საქართველოს პარლამენტთან.

ასოციაცია აგრძელებს მუშაობას კანონმდებლობისა და რეგულაციების გასაუმჯობესებლად და სამომავლოდ ელოდება სამთავრობო ორგანოებთან პროდუქტიულ თანამშრომლობას.