ასოციაციის ივნისის თვის საქმიანობის მიმოხილვა

საქართველოს ვირტუალური ზონის პირთა ასოციაცია, რომლის უმთავრესი მიზანია ასოციაციის წევრების უფლებების დაცვა და მათი საქმიანობის რეგულირებაში გამჭვირვალობის უზრუნველყოფა, დიდი ხანია ცდილობს დაიცვას ვირტუალური ზონის სტატუსის მქონე კომპანიების ინტერესები.

ამისათვის, ივნისში ასოციაციამ მნიშვნელოვანი ნაბიჯები გადადგა, როგორიცაა შეხვედრა ბიზნესომბუდსმენის აპარატთან და ვირტუალური ზონის სტატუსის მქონე კომპანიებთან დაკავშირებული კრიტიკული სიტუაციის განხილვა. შეხვედრაზე ასოციაციამ წამოაყენა სამი ძირითადი საკითხი: ჯარიმების გაუქმება; საკანონმდებლო ინიციატივის აუცილებლობა, რათა კანონი არ დარჩეს გაურკვეველი; IT კომპანიებისთვის მკაფიო კრიტერიუმების განსაზღვრა. ბიზნესომბუდსმენმა გაიზიარა ასოციაციის პოზიცია და აპარატი მზადაა მიმართოს მთავრობის შესაბამის უწყებებს, გამოიკვლიოს ასოციაციის წევრების ინტერესები და გასცეს რეკომენდაციები. ასოციაცია ამ დღეებში ელოდება ბიზნესომბუდსმენის ოფიციალურ პოზიციას, რომელსაც აუცილებლად გაგიზიარებთ.

ასევე, საგადასახადო პრობლემები განხილული იყო გადაცემაში ბიზნეს ფორმულა, სადაც ასოციაციის თავმჯდომარემ განაცხადა, რომ საქართველოში ვირტუალური ზონის სტატუსით ათასზე მეტი იურიდიული კომპანიაა დარეგისტრირებული. გასული წლების საგაასახადო პრაქტიკის მიხედვით, კომპანიებს არ მოეთხოვებოდათ საქართველოში დასაქმებულების ყოლა ან უშუალოდ საქართველოს ტერიტორიიდან მომსახურების გაწევა. მიუხედავად ამისა, კომპანიები იმის გამოც ჯარიმდებიან, რომ მათ ქართველი დასაქმებულები არ ჰყავთ, ან საქართველოდან არ მუშაობენ. კომპანიების 70%-ს დავა აქვს შემოსავლების სამსახურთან და ჯარიმების ოდენობა 4-5 მილიონ ლარს აჭარბებს.

ბიზნეს ფორმულამ ამ საკითხს კიდევ ერთი გადაცემა მიუძღვნა, სადაც საუბარი მიმდინარეობდა მთავრობის სტრატეგიულ გეგმაზე, საქართველო გახდეს რეგიონის ციფრული ჰაბი, რაც ხელს შეუწყობს ქვეყანაში მსხვილი კომპანიების მოზიდვას. შორენა კოპალეიშვილმა ყურადღება გაამახვილა სახელმწიფოსა და ბიზნესს შორის კომუნიკაციის მნიშვნელობაზე. ბიზნესი უნდა გრძნობდეს, რომ ის არის მნიშვნელოვანი სახელმწიფოსთვის. სახელმწიფო და შემოსავლების სამსახური ვალდებულია შექმნას გარემო იმისთვის, რომ ბიზნესმა იმუშაოს და განვითარდეს.

2022 წლის 21 ივნისს, ევროპული ბიზნეს ასოციაციის (EBA) ორგანიზებით და ევროკავშირის მხარდაჭერით, პირველად გაიმართა „ევროკავშირი-საქართველოს ბიზნეს ფორუმი 2022“, სადაც ასოციაციის თავმჯდომარემ, შორენა კოპალეიშვილმა ისარგებლა შემთხვევით და გაესაუბრა სამთავრობო და ბიზნეს ორგანიზაციების წარმომადგენლებს და კიდევ ერთხელ ხაზი გაუსვა VZP კომპანიების წინაშე არსებულ გამოწვევებს.

ვირტულაური ზონის სტატუსის მქონე კომპანიების მიმართ შემოსავლების სამსახურის არასამართლიანი ქმედებები გაშუქდა გადაცემაში „Forbes კვირა“, სადაც მოწვეული იყო საქართველოს ვირტუალური ზონის პირთა ასოციაციის თავმჯდომარე, შორენა კოპალეიშვილი. მისი თქმით, იგეგმება დამატებითი შეხვედრების ორგანიზება ყველა პასუხისმგებელ და გადაწყვეტილების მიმღებ ორგანოებთან.
ასოციაცია აქტიურად თანამშრომლობს სხვა და სხვა უწყებებთან და ასოციაციასთან ამ საკითხის გადასაჭრელად.
საქართველოს ვირტუალური ზონის პირთა ასოციაციის მთავარი მიზანია სახელმწიფოსთან დიალოგის დამყარება და წარსულში დარიცხული ჯარიმების გაუქმება.