ასოციაციის მორიგი შეხვედრა საქართველოს ფინანსთა სამინისტროსა და შემოსავლების სამსახურის წარმომადგენლებთან

მორიგი შეხვედრა გაიმართა საქართველოს ვირტუალური ზონის პირთა ასოციაციის, საქართველოს ფინანსთა სამინისტროსა და შემოსავლების სამსახურის წარმომადგენლებთან, სადაც განიხილეს ასოციაციის მიერ წამოჭრილი ვირტუალური ზონის სტატუსის მქონე კომპანიების დაბეგვრასთან დაკავშირებული პრობლემები. შეხვედრას ესწრებოდნენ ლევან წითელაშვილი (სამსახურის უფროსის მოადგილე), ნინო ფოდიაშვილი (დავების დეპარტამენტის უფროსი), ზაზა თაბაგარი (ანალიტიკური დეპარტამენტის უფროსი), რომან ბუღაძე (საგადასახადო და საბაჟო მეთოდოლოგიის დეპარტამენტის უფროსი) და იურიდიული, აუდიტის და სხვა დეპარტამენტების წარმომადგენლები.

შეხვედრაზე დამსწრეებმა განიხილეს ამ პრობლემის გადაჭრის შესაძლებლობა სამი მიმართულებით:

1. კანონის სრულყოფა;

2. მკაფიო კრიტერიუმების დაწესება;

3. რეტროსპექტულად დარიცხული მოგების, საშემოსავლო გადასახადებისა და ჯარიმებისგან გათავისუფლება.

ასოციაციის განცხადებით, საქართველოში ეს ბიზნესი უზარმაზარი ფინანსური წნეხისა და კრიზისის ქვეშ იმყოფება, ინვესტორები ტოვებენ ქვეყანას, ძირითადი პრობლემები კი პირდაპირ კანონმდებლობაშია. ფინანსთა სამინისტრო თანხმდება, რომ 2022 წლამდე საქართველოში არ ყოფილა არანაირი დადგენილი კრიტერიუმი IT სფეროსთან დაკავშირებით, ამიტომ სამინისტრო სრულ მზაობას გამოთქვამს ითანამშრომლოს ასოციაციასთან ამ მიმართულებით, რათა ჩამოყალიბდეს IT კომპანიებისთვის ცხადი და მკაფიო კრიტერიუმები.

უპირველეს ყოვლისა, აუცილებელია საკანონმდებლო ხარვეზების აღმოჩენა და აღმოფხვრა და მხოლოდ ამის შემდეგ, ვირტუალური ზონის კომპანიების დაბეგვრის არსებული სისტემის გამკაცრება. წინააღმდეგ შემთხვევაში, კანონმდებლობა ორაზროვანი დარჩება და შესაბამისად, დავა გაგრძელდება. ამასთან, ფინანსთა სამინისტრომ და შემოსავლების სამსახურმა გამოთქვეს მზაობა, მხარი დაუჭირონ კომპანიებს რიგ საკითხებში, რაც ასოციაციას დაეხმარება გარკვეული საკითხების გადაჭრაში. 

შეხვედრაზე ევროპული ბიზნეს ასოციაციის წარმომადგენელმა ჯონ ბრეკეველდტმა ხაზგასმით აღნიშნა, რომ საქართველოს ინტერესებშია ბიზნესის ფუნქციონირება ევროპული სტანდარტებით.

21-ე საუკუნეში, როდესაც მთელი მსოფლიო გადადის ვირტუალურ სამყაროში, აუცილებელია ქვეყნებმა ამ მხრივ განვითარების სურვილი გამოთქვან და ბიზნესები მართონ გლობალურად და პოზიციონირებდნენ სწორად. 

ასოციაცია არ აპირებს გაჩერებას, მართავს შეხვედრებს მედიასთან და სახელმწიფო სტრუქტურებთან და ახორციელებს განვითარებისთვის მნიშვნელოვან აქტივობებს.

თუ დაინტერესებული ხართ ასოციაციის პროცესებისა და სამთავრობო უწყებებთან მოლაპარაკებების შედეგებით, თვალი გვადევნეთ, შემოგვიერთდით და მხარი დაგვიჭირეთ, ჩვენ ერთად შეგვიძლია უკეთესი შედეგების მიღწევა.