ღონისძიება საქართველოში დისტანციური დასაქმების საგადასახადო დაბეგვრის თავისებურებების შესახებ

3 მაისს საქართველოს ვირტუალური ზონის პირთა ასოციაცია მიწვეული იყო ღონისძიებაზე “დისტანციური დასაქმების საგადასახადო დაბეგვრის თავისებურებები საქართველოში”, რომელსაც უმასპინძლა ევროპული ბიზნეს ასოციაციამ (EBA) მის წევრ Grant Thornton Georgia / გრანტ თორნტონ საქართველოსთან ერთად.

ღონისძიება მიზნად ისახავდა მიღწევების მიმოხილვას და ქვეყანაში დისტანციურ დასაქმებასთან დაკავშირებული მიმდინარე ფინანსური გამოწვევების განხილვას. ტექნოლოგიების განვითარებამ მრავალ ბიზნესს საშუალება მისცა იმუშაოს სრულიად დისტანციურად, რაც მათ საშუალებას აძლევს ისარგებლონ კვალიფიციური პერსონალის მომსახურებით მსოფლიოს ნებისმიერი წერტილიდან. აქედან გამომდინარე, აქტუალური გახდა შრომითი ხელშეკრულებებით დისტანციურად მომუშავე პირთა დაბეგვრის ვალდებულების სწორად შესრულების საკითხი, საქართველოს როგორც ფიზიკური, ისე იურიდიული პირებისთვის და რა თქმა უნდა, ეს საკითხი აქტუალურია VZP კომპანიებისთვისაც.

ღონისძიების დასაწყისში მისასალმებელი სიტყვით გამოვიდა ევროპული ბიზნეს ასოციაციის პრეზიდენტი ჯონ ბრაეკეველდტი, საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე დავით სონღულაშვილი, ესტონეთის ელჩი საქართველოში რიინა კალიურანდი (TBC) და საქართველოს ბიზნესომბუდსმენი ოთარ დანელია.

ღონისძიების მეორე ნაწილი დაეთმო Grant Thornton-ის პრეზენტაციას, რასაც მოჰყვა პანელური დისკუსია საქართველოს შემოსავლების სამსახურის და ბიზნეს სექტორის წარმომადგენლების მონაწილეობით. გარდა ამისა, მონაწილეებს მიეცათ კითხვა-პასუხის საშუალება.

მნიშვნელოვანია აღინიშნოს, რომ ღონისძიების მონაწილეებმა ხაზი გაუსვეს იმ პრობლემებს, რომლებსაც VIZ კომპანიები აწყდებიან დისტანციურად მუშაობისას, ხოლო სახელმწიფოს წარმომადგენლებმა აღნიშნეს მზადყოფნა ითანამშრომლონ ასოციაციასთან, რაც ცალსახად ადასტურებს, რომ ასოციაციის როლი ამ პროცესში გადამწყვეტია.

შორენა კოპალეიშვილმა ხაზი გაუსვა არსებულ პრობლემებსა და ამ დარგის მნიშვნელობას ქვეყნისთვის, ასევე გამჭვირვალე და მკაფიო საგადასახადო კანონის აუცილებლობას.