შეხვედრა პარლამენტში ვირტუალური ზონის პირის სტატუსის მქონე კომპანიების დაბეგვრასთან დაკავშირებულ საკანონმდებლო ცვლილებების შესახებ

საქართველოს ვირტუალური ზონის პირთა ასოციაციისა და კრესტონ ჯორჯიას მიმართვასთან დაკავშირებით, რომელიც ეხებოდა ვირტუალური ზონის პირის სტატუსის მქონე კომპანიების დაბეგვრასთან დაკავშირებულ საკანონმდებლო ცვლილებებს, 2023 წლის 27 თებერვალს შედგა შეხვედრა საქართველოს პარლამენტის დარგობრივი ეკონომიკისა და ეკონომიკური პოლიტიკის კომიტეტის თავმჯდომარე ბატონ დავით სონღულაშვილსა და  საქართველოს ვირტუალური ზონის პირთა ასოციაციის თავმჯდომარე შორენა კოპალეიშვილს და ევროპული ბიზნეს ასოციაციის წარმომადგენლებს შორის.

შეხვედრის ორგანიზატორი და მხარდამჭერი ევროპული ბიზნეს ასოციაცია. 

საქართველოს ვირტუალური ზონის პირთა ასოციაციის თავმჯდომარემ შორენა კოპალეიშვილმა ბატონ დავითს გააცნო შემდეგი საკითხები:

• საქართველოს ვირტუალური ზონის პირის სტატუსის მქონე კომპანიების წინაშე არსებული პრობლემები 2021 წლიდან დღეის მდგომარეობით და გამომწვევი მიზეზები;

• საქართველოს საგადასახადო ორგანოს მიდგომები ვირტუალური ზონის პირის მოგების გადასახადით დაბეგვრის თაობაზე 2020-2022წწ.;

• ბიზნეს ომბუდსმენის პოზიცია;

• შესაბამისი კანონმდებლობის დაზუსტების აუცილებლობა.

პირველ საკითხთან დაკავშირებით მხარეების პოზიცია წარმოდგენილია კომიტეტისადმი 2022 წლის 28 ივლისის #1-9465/22 მიმართვაში სადაც აღწერილია საქართველოს ვირტუალური ზონის პირის სტატუსის მქონე კომპანიების გარშემო მიმდინარე პროცესები, მიზეზები და დამდგარი შედეგები. მიმართვა წერილობითი ფორმით მიწოდებულია კომიტეტისთვის. ასოციაციამ დამატებით წარადგინა აღნიშნული ბიზნესის განვითარების დინამიკის დამადასტურებელ ინფორმაცია, კერძოდ 2011-2021 წლებში ამ სტატუსის მქონე კომპანიების მიერ საქართველოს სახელმწიფო ბიუჯეტში გადახდილი გადასახადების შესახებ. 

საქართველოს საგადასახადო ორგანოს მიდგომები ვირტუალური ზონის პირის მოგების გადასახადით დაბეგვრის თაობაზე 2021-2022 წლებში არაერთხელ შეიცვალა, რაც დასტურდება სამი სხვა და სხვა მეთოდური მითითების გამოცემით. უფრო ვრცლად ასოციაციის და მისი პარტნიორების პოზიცია წარმოდგენილია აქ, რომელიც ასევე წერილობითი ფორმით გადაეცა კომიტეტს. 

ბიზნეს ომბუდსმენის მხრიდან პოზიციის დაფიქსირება იყო ძალიან მნიშვნელოვანი, სადაც ბიზნესის ძირითადი წუხილები იყო გაზიარებული. პოზიცია წერილობითი ფორმით ასევე მიწოდებულია კომიტეტისთვის. 

შორენა კოპალეიშვილმა კიდევე ერთხელ აღნიშნა, რომ ყველაზე მთავარი და მნიშვნელოვანი საკითხი ეს არის შესაბამისი კანონმდებლობის დაზუსტება იმდაგვარად, რომ არც ერთ მხარეს არ მიეცეს ამა თუ იმ ნორმის ინტერპრეტირების შესაძლებლობა, ხოლო კანონის მკაფიო და ზუსტი ჩანაწერით დაცული იქნას როგორც ქვეყნის საგადასახადო ინტერესი, ისე შეიქმნას ბიზნესის სტაბილურად ფუნქციონირების გარანტიები. 

კომიტეტის თავმჯდომარემ, ბატონ დავით სონღულაშვილმა გამოხატა მზადყოფნა საკითხის უფრო სიღრმისეულად შესწავლასთან დაკავშირებით, ასევე მიიღო გადაწყვეტილება უმოკლეს ვადებში გაეცნოს საქართველოს ფინანსთა სამინისტროს პოზიციას საკანონმდებლო ცვლილებების მიზანშეწონილობასთან დაკავშირებით. 

დაიგეგმა თანამშრომლობის გაგრძელების შემდგომი სტრატეგია. 

საქართველოს ვირტუალური ზონის პირთა ასოციაცია, თავის პარტნიორებთან ერთად აგრძელებს აქტიურ მუშაობას თავისი წევრი კომპანიებისთვის ბიზნეს გარემოს გასაუმჯობესებლად და მათი ინტერესების დასაცავად.