ინტელექტუალური კაპიტალის გადინების რისკი საქართველოში: შორენა კოპალეიშვილი IT სექტორის გამოწვევებს განიხილავს გადაცემაში „საქმიანი დილა“

საქართველოს IT სექტორის მომავალი გარკვეილი საფრთხის ქვეშაა, რადგან მაღალი კვალიფიკაციის მქონე პროფესიონალთა გადინების ალბათობა იზრდება ქვეყანაში არსებული პოლიტიკური და ეკონომიკური არასტაბილურობის ფონზე.

შორენა კოპალეიშვილმა, ვირტუალური ზონის პირთა ასოციაციის თავმჯდომარემ, ერთ-ერთ წამყვან ბიზნესმედიაში, გადაცემა „საქმიანი დილაში“ ისაუბრა მნიშვნელოვან საკითხებზე და მათ შესაძლო გავლენაზე ინდუსტრიაზე.

ინტერვიუში შორენა კოპალეიშვილმა ყურადღება გაამახვილა მიმდინარე კრიზისით გამოწვეულ კრიტიკულ რისკებზე, რომლებმაც შექმნა არაპროგნოზირებადი გარემო IT კომპანიებისა და პროფესიონალებისთვის. მან აღნიშნა, რომ ევროპული კურსიდან გადახვევამ შეშფოთება გამოიწვია საერთაშორისო ინვესტორებში, რის შედეგადაც საფრთხის ქვეშ დადგა საქართველოს რეპუტაცია, როგორც IT ოპერირებისთვის სტაბილური და მიმზიდველი ადგილი.

„საქართველოს IT, უშუალდ კი ვზპ სექტორი ჩვენი ეკონომიკის ერთ-ერთ საყრდენს წარმოადგენს, რომელმაც 2024 წლის ათი თვის განმავლობაში სახელმწიფო ბიუჯეტში 85 მილიონ ლარზე მეტი გადასახადი შეიტანა. თუმცა, ეს წარმატება ახლა საფრთხის ქვეშ დგას, რადგან ინდუსტრიაში გაურკვევლობა იზრდება,“ აღნიშნა ასოციაციის თავმჯდომარემ.

მან აღნიშნა, რომ საქართველოში მომუშავე საერთაშორისო IT კომპანიები, განსაკუთრებით ისინი, რომლებიც ვირტუალური ზონის სტატუსით და საგადასახადო შეღავათებით სარგებლობენ, გამოხატავენ შეშფოთებას ბიზნესგარემოს გაუარესების გამო. ამ კომპანიებს, რომლებიც დამოკიდებული არიან გლობალურ ბაზრებზე და საერთაშორისო კლიენტებზე, განსაკუთრებით აშფოთებთ ქვეყნის პოლიტიკური და ეკონომიკური ცვლილებები.

კოპალიეშვილმა ასევე გაამახვილა ყურადღება იმ ფაქტზე, რომ შემცირდა უცხოური ბიზნესების დაინტერესება საქართველოს საგადასახადო უპირატესობებისა და ვირტუალურ ზონაში არსებული შესაძლებლობების შესახებ. „ამ ტენდენციამ დაგვანახა უფრო ფართო პრობლემა – საქართველო კარგავს თავის მიმზიდველობას საერთაშორისო ინვესტორებისთვის. გაურკვევლობა ართულებს კომპანიებისთვის ბიზნეს პროცესების დაგეგმვას, საგადასახადო პროგნოზირების გაკეთებას და გრძელვადიანი ვალდებულებების აღებას,“ – განმარტა მან.

„საქმიან დილაში“ საუბარი ასევე შეეხო არასტაბილურობის გავლენას ინდუსტრიის მუშახელზე. კოპალიეშვილმა აღნიშნა, რომ მრავალი IT პროფესიონალი განიხილავს სხვა ქვეყნებში გადასვლას, სადაც უკეთეს შესაძლებლობებსა და უფრო პროგნოზირებად გარემოს სთავაზობენ. პროფესიონალების გადინება უარყოფით გავლენას მოახდენს საქართველოს შესაძლებლობაზე, შეინარჩუნოს კონკურენტუნარიანობა გლობალურ ტექნოლოგიურ ბაზარზე.

მან საუბარი დაასრულა მოწოდებით, რომ ყველა მხარემ მიიღოს გადაუდებელი ზომები სექტორში ნდობის აღსადგენად. „ჩვენ გვჭირდება სტაბილური და პროგნოზირებადი გარემო, რომელიც ხელს შეუწყობს ინოვაციასა და ბიზნესის ზრდას. ევროპული ფასეულობების ერთგულება და ევროპული ორიენტაციის კურსის შენარჩუნება მნიშვნელოვანი არის პროფესიონალების შენარჩუნებისა და ინვესტიციების მოზიდვისთვის,“ – განაცხადა შორენა კოპალეიშვილმა.

მან ხაზი გაუსვა IT სექტორის წინაშე არსებული გამოწვევების გადაჭრის და კონკრეტული ნაბიჯების გადადგმის აუცილებლობას, იმისათვის, რომ საქართველო დარჩეს ინოვაციების, პროფესიონალებისა და საერთაშორისო ბიზნესის ცენტრად.