შემოსავლების სამსახურმა გამოსცა მორიგი მეთოდური მითითება, სადაც დარგის წარმომადგენელთა შენიშვნები გათვალისწინებულია

ვირტუალური ზონის სტატუსის მქონე კომპანიების საკითხი ახლა ყელაზე მეტად აქტუალურია. შემოსავლების სამსახურის მიერ გამოცემული ახალი მეთოდური მითითების შესახებ დეტალები განიხილეს გადაცემა „ბიზნეს ფორმულაზე“.

ამ მეთოდურ მითითებაში გათვალისწინებულია ინდუსტრიის წარმომადგენლების კომენტარების უმეტესობა, მაგრამ გაურკვეველია, გაუქმდება თუ არა წარსული ჯარიმები ამ დოკუმენტის საფუძველზე. პარალელურად კი, კომპანიების აუდიტი და ჯარიმების დაკისრება გრძელდება.

თემასთან დაკავშირებით გადაცემაში საკუთარი მოსაზრებები გამოთქვეს „ვირტუალური ზონის პირების“ სტატუსის მქონე კომპანიების წარმომადგენლებმა და განაცხადეს, რომ საქართველოში ბიზნესს მრავალი წელია ეწევიან. მოულოდნელად შეცვლილი საგადასახადო მიდგომის გამო, ისინი დაჯარიმდნენ მიუხედავად იმისა, რომ რეალურად ქმნიდნენ ტექნოლოგიურ პროდუქტებს. აღინიშნა, რომ მაშინ ასეთი მეთოდური მითითება არ არსებობდა; შესაბამისად, მათ მიაჩნიათ, რომ შემოსავლების სამსახურს არ უნდა დაეკისრა ჯარიმები რეტროსპექტულად და კომპანიებისთვის უნდა მიეცათ გარკვეული დრო ახალ ვითარებასთან შესაგუებლად. ზოგიერთი კომპანიისთვის სიტუაცია დღემდე არ შეცვლილა. შემოსავლების სამსახურმა აუდიტის პროცესი კიდევ 3 თვით გაახანგრძლივა. მთლიანობაში კი საგადასახადო შემოწმება უკვე წელიწადნახევარია მიმდინარეობს. მათ ექმნებად შთაბეჭდილება, რომ შემოსავლების სამსახურის აუდიტის მთავარი მიზანი ყველა შემთხვევაში კომპანიის დაჯარიმებაა და გაურკვეველია ვინ დაუბრუნებს ამ კომპანიებს ორი წლის განმავლობაში იურისტებზე დახარჯულ თანხებს, დაკარგულ შემოსავლებსა და რაც მთავარია დროს და ძალისხმევას.უნდა აღინიშნოს რომ დაზარალებული კომპანიების უკან დგას რეალური ინვესტორები და მიუღებელია ყველას ერთნაირ მდგომარეობაში დაყენება.

მთელი ეს ვითარება უარყოფითად აისახა არა მხოლოდ ცალკეული კომპანიებისა და ინვესტორების მდგომარეობაზე, არამედ ქვეყნის მთლიან საინვესტიციო გარემოზეც. ფაქტია, რომ ბევრმა კომპანიამ საქართველოს ბაზარი უკვე დატოვა.

მიუხედავად ახალი მეთოდური მითითების გამოცემისა, რომელშიც შემოსავლების სამსახურმა გაითვალისწინა დაზარალებული კომპანიების და ინვესტორების არგუმენტები, ცხადია, რომ საჭიროა კანონის დაზუსტება, რომელიც განსაზღვრავს, თუ რა შემთხვევაში იბეგრებიან და თავისუფლდებიან გადასახადისგან ამ სტატუსის მქონე კომპანიები, რადგან არ არსებობს გარანტია იმისა, რომ შემოსავლების სამსახური ახალი მეთოდური მითითებით კიდევ არ შეცვლის მიდგომას.

ნორმებისსაკანონმდებლო დონეზე სიცხადის მნიშვნელობას მტკიცედ უსვამს ხაზს ასოციაციის თავმჯდომარე შორენა კოპალეიშვილი. მან პოზიტიური ტენდენცია ახსნა იმით, რომ ასოციაციის უმეტესი შენიშვნები იქნა გათვალისწინებული, მაგრამ ბიზნესისთვის სიცხადე და მომავალი სტაბილური ო გარემო მხოლოდ კანონით არის უზრუნველყოფილი.

Kreston Georgia-ს მმართველმა პარტნიორმა დავით პაპიაშვილმა გამოთქვა მოსაზრება, რომ ახალი მეთოდური მითითებიდან გამომდინარე, არსებობს ჯარიმების გაუქმების იმედი და აღნიშნა გადასახადის გადამხდელთა მესამე ჯგუფი, რომლებიც დაჯარიმდნენ, მაგრამ მათ არ გაასაჩივრეს გადაწყვეტილებები. მისი აზრით, იკვეთება ახლად აღმოჩენილი გარემოებების ნიშნები და ამ კომპანიებმაც უნდა ეცადონ დავის განახლებას.

საინტერესოა ასევე, რომ შარშან აღნიშნულ საკითხთან დაკავშირებით საკუთარი პოზიცია დააფიქსირა ბიზნეს ომბუდსმენმაც, რომელმაც შეიძლება ითქვას, რომ ძირითად საკითხებთან მიმართებაში შესაბამისი კომპანიების პოზიცია გაიზიარა.

ამ დროისთვის შემოსავლების სამსახურსა და ვირტუალური ზონის პირის სტატუსის მქონე კომპანიებს შორის დავა როგორც ფინანსთა სამინისტროს დავების საბჭოში, ასევე სასამართლოშიც მიმდინარეობს. ასოციაცია კი კვლავ აგრძელებს მუშაობას კანონში შესაბამისი ცვლილებების მისაღწევად.